Kunstlandskap MIDT - Ålesund kommune søker kunstkonsulent

Ålesund kommune søker kunstkonsulent til eit kunstprosjekt som opnar for ulike stemmer og nye blikk på kven vi er og kven vi kan bli, der kunst kan vise veg til identitet, framtid og nye perspektiv.

Ålesund kommune er den største kommunen mellom Bergen og Trondheim, og eit regionsenter for Nordvestlandet. Kommunen har nesten 60 000 innbyggarar. Området rundt byr på fantastisk natur og kommunen har eit rikt og blomstrande kultur- og næringsliv. Ålesund er universitetsby, med KUBE og Jugendstilsenteret, Ytre Kunstfagskule og vgs. med kreative fag lokalisert i kommunen.

Kommunen er ein stor arbeidsgivar med viktige samfunnsoppdrag. I det daglege arbeidet vektlegg vi verdiane våre: open, engasjert og modig. Visjonen for kommunen er «nasjonal slagkraft, regional attraktivitet og lokal identitet». Kommunen ser på kunst og kultur som ei samfunnsbyggande kraft. Vi har mykje kunst i offentleg rom, og ambisjon om å bruke kunst som verkemiddel i samfunnsutviklinga.

Kunstlandskap MIDT -  Ålesund

Ålesund er ei samanslått kommune og vi ønsker at dette kunstprosjektet kan vere eit av fleire gode prosjekt som bidreg til å skape opne møteplassar, finne felles møtepunkt og samhald i den nye kommunen. Vi ønskjer å skape eit kunstprosjekt som opnar for ulike stemmer og nye blikk på kven vi er og kven vi kan bli, der kunst kan vise veg til identitet, framtid og nye perspektiv.

Prosjektet skal resultere i eit permanent kunstverk i offentleg rom, med sterk lokal forankring og høg kunstfagleg kvalitet. Kunstverket skal vere utandørs, allment tilgjengeleg og integrert i sosiale møteplassar eller landskap som alt blir nytta av innbyggarane. Vi ser for oss ein prosess som inkluderer alle dei tidlegare kommunane, der kunstverket gir heile kommunen noko felles å sameine seg om.

Det er viktig for oss at kunsten kjem til som ein demokratisk prosess, der medverknad frå innbyggarar er viktig både for å styrke fellesskap, identifisere verdiar og identitet i heile kommunen. Kunsten skal gi nye blikk på kven vi er og kven vi kan bli. Det er også viktig å opne opp for nye stemmer og perspektiv.  Det vil vere kommuneadministrasjonen som gjennomfører medverknadsprosessen.

Ålesund har motteke eit gåvetilskot på 3 millionar til dette prosjektet. Andre prosjektmidlar kan kome til.

Du som kunstkonsulent får:

• Vere med og utvikle kunstprosjektet frå begynninga
• Bidra til etablering av kunstkomiteen
• Utforme kunstplanen
• Bidra i tilsetting av kunstnar/kunstnarar
• Påverke lokalisering av kunstverk
• Bidra inn i medverknadsprosessane
• Dedikert prosjektansvar frå kulturavdelinga

Vi ønskjer oss:

• Ein prosjektleiar med erfaring frå større utsmykkingsprosjekt og kunnskap om kunst og kunstnariske prosessar
• Det er ein fordel å ha noko kjennskap til kommunen og kulturlivet her
• Ein kreativ, god organisator og formidlar
• God framdrift i prosjektet.

Tilsettingsform og organisering av arbeidet vil bli avtalt i samarbeid mellom kunstkonsulent og kommunen.

Ta kontakt med Sissel Aarseth, rådgivar kultur, tlf. 911 52 030 eller e-post: sissel.lillebo.aarseth@alesund.kommune.no for avklaringar eller spørsmål.

Sjå vedlegg for fullstendig utlysing og nærare informasjon om oppdraget.